MNF in hmasawnna hna a thawh nasatzia hrechiang tute chu Zoram mipuite- MNF President

by News Editor

Tualchhung News

ZORAM TODAY| 18th August, 2025(Mon): Vawiin hian Mizo Hnam Runah MNF chuan chhung inkhawm an nei a, he hunah hian MNF President Zoramthanga chuan thu sawiin, MNF sorkar hunlaia Peace bonus leh MNF sulhnute sawinep tum an awm ṭhin tih a sawi a. "MNF sulhnute kha sawinep theih a ni lo, record awm vek leh a taka hmuh theih vek a ni. MNF-in development a din pahnih chauh sawilang ta ila, sipai ramluah chhuhsak a, MINECO kan din leh Lunglei World Bank road ringawt pawh hi a nep lohzia mipuiin an hria a ni," a ti.

Chief Minister hlui chuan, "Kum 1998-a MNF-in sorkarna a siam khan Mizoram sorkar sum dinhmun kha a chhe tak zet a. Leiba tam tham takin min delh a ni. Chu chu kan sawi ni lovin Congress sorkara Finance Minister ngeiin sorkar sum chhiatzia hi a sawi a ni. Delhi-a Finance Ministry nen kan han en a, "Peace Bonus" tia hming phuahin Mizoram chhanchhuahna tur sum kan dil ta a. India rama ram buai ber ni ṭhin kha a ralmuang berah kan ṭang ta a, chumi pual chuan peace bonus chu kan dil ta a ni," a ti.

Zorama chuan, "Peace Bonus kha vaibelchhe 175 kan dil a, kan dil aia tam daih, kan ba rulhna atana daih tur law law vaibelchhe 182.45 min pe ta a ni. Hetih laia kan plan budget zatve thuak min pe kha a ropui tak zet a ni," a ti a. Peace Bonus sawi nep tumna awm ṭhin leh MNF hnathawh ropui tak takte kha sawinep tum awm ṭhin mahse, kan sawi ve zel dawn a. Tin, MNF sorkar-in hmasawnna hna a thawh nasatzia kha a hrechiangtute chu Zoram mipuite an ni," a ti bawk.

He hunah hian zalenna sual laia India sipaiin an man, kum 5 chuang hreawm taka jail an tan tir, B Vanlalzari, MNF Adviser pawhin thu a sawi a. "Kutthlak nasa tak tuar mah ila, vai hian ka mittui an vaw chhuak zo lo, ka tan vangin vawi khat mah ka ṭap lo," a ti a. "MNF hi Mizo hnam tungding a, chhanchhuak tura Pu Laldenga te din a ni a. MNF hi Party dang anga mahni hamhaina leh ropuina zawng ve tur kan ni lo," a ti.

B. Vanlalzari chuan, "Pathianin Mizo hnam a dinchhan ang ngeiin zalenna famkim kan la neih hi ka ring tlat a. Pu Laldenga'n 'State hi chu kan hahchawlhna tur chauh a ni' a tih kha ka ring tlat a ni," a ti a. "Zalenna sualtute khan a lemin an sual lo a, a lemin an tuar lo a, a lemin an thi hek lo. Khang lai khan Aizawlah hian kan nulate'n sari an kaih hman tawh a. Zalenna kha sual lo ta ila vawiinah hian kan hnam hi chimralin kan awm tawh hial mai thei a ni," a ti bawk.

He hunah hian MNF President hian voter paruk MNF-ah a lawmlut a. Lawmluh zingah hian ZPM VC member leh ZPM Unit President te an tel.

Lalchhandama Ralte Leader of opposition, MNF Vice President pawhin thusawiin Dampa bial MNF Legilature Party-in an fan report a pe. He inkhawm hi Pu R Tlanghmingthanga ex Minister, NCC-in a kaihruai a ni.